![Орхон аймагт жилд дунджаар 70-80 хүн сүрьеэгийн халдвар авдаг байна Орхон аймагт жилд дунджаар 70-80 хүн сүрьеэгийн халдвар авдаг байна](/uploads/posts/2019-06/thumbs/1559810826_5cf8c94d45e7a.jpeg)
Орхон аймагт эхний таван сарын байдлаар сүрьеэгийн 34 тохиолдол бүртгэгдсэн байна. Жилд дунджаар 70-80 тохиолдол бүртгэгддэг гэж аймгийн ЭМГ-ын мэргэжилтэн Д.Тунгалагтуяа хэллээ.
Мөн өнгөрсөн онд дөрвөн хүүхэд сүрьеэ өвчнөөр өвчилсөн нь тогтоогдож гэр бүл, ойр дотныхныг нь шинжилгээнд хамруулжээ. Аймгийн БОЭТ-ийн Сэтгэц, сүрьеэгийн 25 ортой тасаг нь сүрьеэгийн мэдрэг халдвартай болон олон эмийн дасалтай өвчтөнүүдийг эмчилдэг байна. Үүнээс олон эмийн дасалтай сүрьеэ өвчин нь хоёр жил гаруй хугацаанд уйгагүй хичээл зүтгэлийн дүнд эмчлэгддэг гэдгийг Д.Тунгалагтуяа мэргэжилтэн онцоллоо. Гэтэл иргэд эмчилгээгээ эхлүүлэнгүүтээ түр завсарлах, орхих, бүрмөсөн хаяснаас болж өвчин нь улам хүндэрч бусдад халдаах эрсдэл бий болдог ажээ.
Монгол Улс нь ДЭМБ-ын Номхон далайн баруун эргийн бүс нутгийн 37 орноос сүрьеэгийн халдвараараа эхний дөрөвт жагсдаг тул хүн амын эрүүл мэндийн боловсролыг дээшлүүлэх шаардлагатай байгаа ажээ. Иймд эрүүл мэндийн байгууллагаас сүрьеэ өвчний үзлэг, оношилгоо, эмчилгээг үнэ төлбөргүй хийж байна.
Харин Орхон аймаг өнгөрсөн онд "Эрүүл Эрдэнэт хүн” аяныг зохион байгуулж зорилтот бүлгийн 500 иргэнийг сүрьеэгийн илрүүлэг шинжилгээнд хамруулснаас 13 нь уушгины хавдар, 97 нь сүрьеэ өвчний эхний шатандаа байгаа нь илэрч эмчилгээг эхлүүлсэн байна.
Танд энэхүү мэдээ таалагдаж байвал Like дарна уу.
Танд манай сайт таалагдаж байвал Like дарна уу. Танд баярлалаа