Орхон аймаг буюу Эрдэнэтэд Турк сургуулийн сурагчид энэ сарын нэгэнд хоолны хордлого авч аймгийнхаа Бүсийн оношлогоо эмчилгээний төвийн Халдвартын тасагт хэвтэн эмчлүүлж байна.

Хордлогын шалтгааныг тодруулахаар хэвтэн эмчлүүлэгчдийн өтгөнд шинжилгээ хийхэд "shingelii flexneri” нян илэрсэн байна. Бусад шаардлагатай хяналт, шинжилгээг хийж байгаа ажээ.

Анх зургадугаар сарын нэгний 14:00 цагийн үед 10 хүүхэд хоолны хордлого гэсэн оноштойгоор хэвтсэн нь нэмэгдсэнээр 40 болжээ. Мөн насанд хүрсэн таван хүн хоолны хордлогод орсон байна.

Өнөөдрийн байдлаар нийт 45 хүн эмчлүүлж байгаа аж. Бүсийн оношлогоо эмчилгээний төвөөс хордлогод орсон иргэд, хүүхдэд шаардлагатай эмчилгээг хийж буй гэнэ.

Одоогоор биеийн байдал нь хүндэвтэр, суулгалт ихтэй 13 хүнээс том хүн нэг, бусад нь хүүхдүүд юм байна. Бусдынх нь биеийн байдал дунд зэрэг байгаа аж.

Тавдугаар сарын 30, 31-нд дээрх сургуулийн 6-12 дугаар ангийн сурагчид сургууль дээрээ үдийн хоол иджээ. Үдийн хоолонд өндөгтэй кембаб, пирошки, тарвас, гуляш, будаа, гоймонтой шөл, төмсний хучмал, жимсний салат өгсөн юм байна.

Хоол идсэний дараа хүүхдүүдийн гэдэс базалж, гүйлгэх, улмаар 38.5-40 хэм хүртэл өндөр халуурч, цустай гүйлгэх, зүрх дэлсэх зэрэг зовиур илэрсэн байна. Хордлогод орсон хүүхдүүдийн 20 нь дотуур байранд, 17 нь гэртээ амьдардаг байжээ.